Jerita Penti Pemali Mancing Pala Ular

Jerita tuai penti pemali kemik mancing pala ular..

Agi suba kira tahun tahun 1980 an bakanya.Nyadi bisi orang penatai begiga ke Ulu Katibas maianya kira sepuluh buah perau sida ia to kulu kin begiga,nyadi maioh sida to atai kin tadi begiga ke ikan,babi enggau utai bukai meh laban menya agi nadai orang betagang begiga utai ba kampung puang janji madah aja agai Tuai Rumah ti ngempu menua sigi dasuh orang aja sida ia kia laban kelia nadai SISTEM TAGANG baka kediato.Sistem Tagang keterubah nyadi ba menua Sungai Tisa ba Kapit din ti ngetan orang maioh begiga utai hidupan liar ngau peneka ati.

Pulai agai jerita tadi atai ba ulu Katibas diak sida sabuat begaga ke langkau naka pemanjai nebing emperan.Mula ia sida ka ngaga langkau kena tumpu nanga sungai yang orang tuai madah pemali nya,ba penemu orang tuai kelia kitai enda tau ngaga langkau tumpu ai sungai tauka enda tau tindok ba karangan kena tumpu ai sungai ba nanga sungai nya tadi laban kelia kala nyadi kitai dayak mati dicekak antu raya laban ngempang pejalai ia,baka antu Ranggau enggau Gelayan sigi ka munuh kitai mensia ti tindok ba karangan tumpu ai sungai ba nanga sungai.Anang encuba kaban ulih bebadi kitai laban utai to,ga ti ka tindok tau kulu gik ari nanga sungai tauka kili ai ari nanga sungai nya tadi..

Pulai agai jerita pun tadi..

Nyadi bisi siko antara sida ia ngaga langkau ngempang jalai bedarat kaki tang di lara orang ketuai ia enggai ninga majak ke runding ia aja.Meda bakanya lak ke orang tuai aja laban orang tuai nemu ia bisi pengering ko ia meh nya.Udah sida begaga tempara kena nyalai utai sereta tembu begiga ke kayu nyadi ke unggun api diak sida begiga utai kelauk dulu sereta ia ke enda enggau tadi berapi.Nyadi lebuh sida ke begiga ke ikan ti namak sungai diak sida ngulu kulu berambat ngena pukat alu enda mukai mukai bisi siko lelaki ke biak nyau reradak nyeraoh meda pemaioh ikan tama pukat,tak enda mukai mukai ikan ke maioh nya tadi baka ke lesap nadai di peda agi.Tak ransi semua lubuk dambat sida ngena pukat tang nadai meh ikan,nasib bulih ikan kedulu tadi,enti enda pia nadai berlauk maia makai kelemai nya tadi.Pulai sida ke begiga tadi diak sida alu ngintu utai ke ulih alu maioh meh pansuh sida ia.Ba kampung puang utai dpandok enda tau diresih tauka digoreng laban remaong to ka mai ngiga bau utai kenya.Sereta anang sesekali nunu gerama tauka belacan laban utai nya dijaga ia utai tupi ia ti ia nemu sigi ngiga alai orang ke nunu nya alu enda chamang alu nyerang kitai ti nunu nya tadi.

Bisi siko lelaki ti penama Ucung ti ngau sida tadi tak terkenyit meda ular pasir ti dindik ia diak Ucung alu nencang pala ular nya tadi ngena batu ngujung ke ular nya mati,laban ke agi pedis ati ketegal terkenyit diak Ucung alu kemik alu mancing ai kemik ia ba pala ular nya.Seretai ia tembu bado kemik nya tadi peda tak enserul ular kebukai ari pasir tak entanjal ular ari reba alu temepak ular ari pucuk kayu,keno ko sida ti enggau tak naka pemaioh ular tadi pansut ari batu ari pasir ari tebing ari pun kayu,ari ular mit ti enda bisa pansut ngujung ular ke bisa sereta kebesai pansut ti ngelingngi tudah Ucung,sida kabukai nyau kekebak kaki laban meda utai naka penyelai nya nyadi.Bisi orang bujang ti bernama Sirai nyau terkemik ba tancut laban meda utai baka nya..Semua ular ngelingngi Ucung ti berdiri nyau nyabak minta sah minta tolong,tang bisi apai tuai siko ti tau dkumbai bisa penemu alu ngasuh Ucung lubah lubah duduk,nasib Ucung ka nitih,keno ke orang ti nusi to,ular majak datai sedatai nyau penuh tanah seberai nyau penuh kerangan ari ulu enggau ili laban pemaioh ular kabukai ti datai,tak enda berasai pansut bunsu ular ti burak perencing tubuh alu mata ia berkilat alu pala ia bisi geliga ti perencing.Kira enda lama dahnya diak apai tuai ti nemu to tadi jampat nengkira piring kali lapan,jari Ucung dsayat mimit kena ngulih ke darah ia kena nyengkelan piring enggau nyengkelan patung kayu purang ti digaga,alu apai tuai nya jampat ngasuh sida ke bukai nebang kayu purang,udah kayu purang ditebang diak apai tuai to tadi alu ngari kayu purang nya ngena gari Ucung kebukai alu ia ngambi darah manok di gulai enggau darah Ucung alu ditanjah ia ba kayu purang nya tadi.Ia alu duduk maca pucau maca leka biau.

Lebuh ia tembu ngereja pengawa nya diak tak meregum tanah dindik utai,pemesai betis orang nya bisi 5 pemerap ti dipeda terengkah ba inting bukit sepiak ba bukit seberai.Meda kenya diak apai tuai ti benama Chiri to tadi alu ngambi Ucung udahnya patung ti digaga pia aja ti dah dibaca alu dengkah nganti Ucung,seretai Ucung dah selamat diak Apai tuai ti benama Chiri to tadi ngunsut tubuh Ucung ngena tanah ladu ti ba tanah ngica antu enda ngelala ia agi alu telih ia tadi alu di unsut ngena kapo,ngica antu enda ensium bau darah Ucung ba tubuh kediato.

Nasib tudah Ucung to tadi agi idup ti orang nadai bisi penemu baka apai tuai nya tadi bisi ari ia dempa antu tinggi...Tubuh kayu ti nganti Ucung tadi dijengkau utai naka pemesai nya jari nyau mesai pemerap anak mit tunjuk jari ia dpeda sida ke diak.

Sitik pekat aku anang sesekali kitak ngempang ngaga khemah senentang pejalai kaki ti selalu dipansa kitai ba kampung puang laban kitai sigi bulih di cekak antu ti jai,ti ba tisi jalai enda ngawa ko orang tuai madah..

Naka to dulu kaban..Ila ku nusi baru...

Ka nanya bala ke maca,keni penemu nuan kaban ba senentang utai penti baka to???

SARAWAK MYTHOS

Jerita Penti pemali muai asi ditanam kitai dayak.

Ba kenang jerita keserak to aku ngenang siko lelaki ti bernama Miegek.Menya agik maia taun 60 an kenya bisi kitai Iban mudik kulu gai menua Pelagus kediato laban ka begiga utai pemakai nyadi maioh meh sida ia tadi indu enggau lelaki enggau magang seraya ka meda menua orang ke Pelagus kin maia ke ai batang rajang langkang agi menya.Nyadi nyau ke tengahari diak sida to tadi nyau ngetu makai,ba karangan ti besai,udah mansau lauk diak sida sama makai magang tang laban ke Miegek to bam makai enyau berdunjung pinggai ia alai asi,bisi ngempat pinggai ia makai nyau kelima pinggai diak nyau enda alah ia tadi asi ba pinggai ia,laban malu di kejako orang diak Miegek to tadi alu duduk kebukai ari bala maioh ke bedau agi ngipung lauk,udah ia nuduk kediri ba kayu ti tumbang diak ia alu muai asi ba pinggai ia tadi ba ngimbai pun kayu ti tumbang enggau jampat jampat takut dipeda orang maioh.Ia ngelalai asi ti dibuai nya ngena daun rau.

Nyadi udah ia tembu muai asi nya diak ngesen kediri ba mua orang maioh diak madah diri kenyang.Udah tembu makai diak sida kabukai tadi alu bepun begaga kelangkau ba endur nya.Udah tembu ngaga langkau sida alu begiga ke ikan dulu nubai sungai ke mit mit kena kelauk ke malam negi.Nyadi bisi siko lelaki ti benama Jali ti nurun ngipa jelu ba menasan apan.Diak ia ngipa kediri aja,tak enda mukai mukai diak ia malik kebaruh diak meda siko indu dara ti cukup bajik duduk ba daun ti baka ditusun,indu nya senyum senyum meda ia tadi alu ngangau ke ia ngasuh Jali nurun kebaruh ngica seduai ia betunga berandau manah ko ia.

Nama agi deh Jali alu nurun pucuk kayu alai ia ngipa tadi alu kira bisi bisi sepuluh depa ari indu nya tadi diak Jali teringat ke ajar orang tuai bakka to,"kena ngelai mensia nya amai mensia tauka antu ia nya ari garis dua line ari idung agai mulut atas ti dkangau kitai iban rinsang asal kitai mensia,enti bisi nya dipeda nya meh mensia enti nadai nya meh antu" ko ati ia din bejako kediri.Tak perati ia manah mua indu nya tadi tak nadai garis tanda kelai nya.Nemu meh Jali indu nya antu.Diak Jali teringat ajar orang tuai ti penduduk indu tauka lelaki nya tak duduk mepek(duduk baka nyembah raja,kedua kaki ia kebelakang alu jari ia dipelalai ia ba senentang belakang nya meh antu telanjing kijang).Ti kita meda utai baka to anang damping sekali kaban au laban ti kita damping kitak ulih gila ti kitak kena tikau sirih pinang penunang antu telanjing to tadi..

Alu ketawa mit meh Jali to tadi udah nemu nya antu telanjing ti ka nunang ia,diak Jali ngambi ranting kayu ti udah mati,diak ia alu matah ke kayu nya tadi diak meh indu alu engkecit alu bebali nyadi kijang alu bemunyi "caong".Udahnya Jali ngipa baru ba diak tadi,ia nemu antu telanjing ti bebali nyadi kijang nya tadi sigi enggai kia baru laban kijang nemu ia parai bunuh mensia ti mensia udah nemu ia antu telanjing.To meh kabuah maioh orang gila ketegal dayah ke antu telanjing ti maioh bebali nyadi mensia ti bajik ti sigat tang ia meri kitai mensia nyadi gila.

Lebuh nganti Jali atai ngipa diak sida kabukai tadi majak nubai majak ngetan bubu ti besai.Udah Jali dpeda ngemai babi siko enggau rusa siko naka meh pegaga ati sida ke diak.Nyadi kelemai nya capuh meh sida ia berintu utai dulih Jali tadi,udah berengkah makai,bakanya ga gaya tudah Miegek to tadi.Udah tembu makai nyadi malam nya tadi diak sida pen tindok tang penyelai ia sida bermimpi sama magang ti meda Miegek muai anak mit naka pemaioh ba senentang pun kayu tumbang baka ke pengawa Miegek ti maia ketengahari tadi enggau kelemai nya ba dalam mimpi sida ia.Lebuh maia sida meda anak mit to nyabak ngujung bisi indu siko ti naka pemajik to tadi ti pansut ari babas alu madah diri anak Bunsu Sempandai agai sida ia alu ia malik ke agai Miegek enggau mua naka pegeringat.Ia alu bejako to"oiii Miegek dik to meh mensia ba baruh dunya to ti enggai nerima penatai anak anak kami,peda dik bala anembiak nya nyau nyabak laban dibuai dik pia aja,ari mit nyentuk kebesai to dik ngayah dik buyah anak kami ari menua nisi langit nyin,enti dik enggai enda ibuh makai sekali ga dik nya,sida ia sigi ulih anak mit ti tau dempa kitak mensia ngica ke kitak ulih besai ulih kering ulih idup ari seput anak kami ti nampung idup kitak mensia,bepun ari to ku nyumpah dik Miegek sigi enda bulih padi nyentuk ke wit dik ila." ko indu nganu Miegek.Udah indu to lesap diak ba diak nyau tedani magang lebuh ninga munyi burung cecuwit nanda ari ka pagi.Lebuh sida tedani diak sida ninga baka anak mit ti nyabak,sida ke diak alu begiga ke nyawa tadi tang puas sida ngiga tadi diak bisi indai tuai siko ninga penatai nyawa ke nyabak nya selepak pun kayu tumbang,diak indai tuai alu reraoh madah nala kabukai nyawa ke nyabak nya ba pun kayu ti tumbang,nama agi kia magang meh sida kabukai,laban Jali to berani tak reda ia pun kayu tumbang nya tadi tak rerangap Jali meda penatai nyawa nya atai ari asi ti dibuai Miegek kemari,nyau alit ati magang sida kabukai meda utai ke nyadi tadi.Meda sida ke bedau alit ati diak tuai rumah sida ti sama enggau ba diak alu ngasuh sida ke indu ngumpul asi nya tadi alu asuh ia tungkus ngena daun biro alu dasuh ia beri agai ikan ti bedau idup ba bubu ditan sida ia kemari.Nama agi deh,ambis meh asi nya dempa ikan ke ulih bubu tadi.Udah tembu pengawa nya tadi diak tuai rumah to nusi jerita semengat padi to tadi baka ke tusi ku kemari.

Ka nemu gik..pagila ku nusi baru au..bisi tampong jerita to kaban.Jerita ditusi tuai rumah to ba pasal jerita semengat padi..nyadi nyentuk kediato peturun Miegek agi bedau bulih padi enti bumai sereta pdis mai sida ia ka bulih utai enti ngiga pemakai ari beras.

Ba nuan kaban,keni ko nuan senentang utai baka to??believe or not??
Ti ku meh sigi believe penti to.Laban agi mit ka amai niang aki nganu enti makai nemera ke asi,sema jako seleka leka asi pen enda tau tinggal ba pinggai.Nyentuk kebesai to semua kami menyadik nadai ningal seleka asi ba pinggai.Amai berau cina pen kami menyadik kenya laban teleba ari mit sampai ke besai nda ngayah ke asi,laban asi ari asil titik peluh kitai ngulih ke duit.Hargailah Asi to tadi kaban laban ia tusah dulih kitai.

Sarawak Untold Story.

Lari ke ujan tetemu ke lubang pedian lari ke sungkup tetemu ke pendam....

Nyadi kelia ba Batang Kapuas bisi apai tuai siko ti bernama Gindam,nyadi Gindam to sekali kumai alu bermalam enggau anak bini ia ba langkau umai ti bejalai nyau ngalih ari baru atai.Maianya dunya bisi aman mimit nadai siga endar.Nyadi pagi nya dani diak Gindam ngabas bubu,naka meh pengaga ati ia meda bubu ia bulih amai,meda kenya ia gaga at naka pengaga,nyadi maianya ia terpeda ke sida sarumah ia nya Sandai enggau Peragi,ti benung pulai ari ngabas umai ari ulu umai Gindam.Diak Gindam reraoh ngangau ke seduai ia ngasuh ngalu niki ke langkau sama enggau ngintu utai ulih bubu ia.Udah tembu ngintu utai ulih bubu Gindam alu bini ia Sinak enggau Peragi mandok lauk nyadi anak Gindam teranggap ja ngipung tunu ikan palau enggau ikan semah,nyadi Gindam enggau Sandai sama ngirup tuak betabas ke tunu ikan,diak Gindam nyau teringat ke bubu ia ba pemendai ia diak empai dabas agi,diak ia madah ke ngabas nya dulu lebuh meda bini ia ngau bini Sandai nyau ka berenah makai,diak Gindam madah anang guai dulu laban ia ka nurun ngabas bubu dulu ko ia,tang lebuh ia nurun bini ia reraoh ngangau ke ia nego dulu asi enggai ke punik,ia madah nadai ngacau ko ia laban ia damping ngabas bubu nya.

Tang lebuh ia ngabas bubu tak ngenyit ari ujan nyala ke tengahari.Lebuh Gindam atai dirumah ngemai asil ulih bubu tadi diak tak gesak gesak madah diri parai datai di langkau umai.Nama agi deh tak parai nadai ngajar leka jako ke bini anak meh ia tadi.Diak Sandai nyau temati kutu meda utai bangat nyelai nya.Meda kenya Sandai ngasuh bini Peragi enggau Sinak nguan bangkai Gindam laban Sandai ka berpadah kerumah panjai ti madah Gindam ti udah mati alu ngemai sida sarumah baum ngubur ke tubuh Gindam.

Ngenang jerita Peragi enggau Sinak tadi,enda mukai mukai ari ujan balat mai..diak saduai ia berasai nyau enda nyamai ati majak bulu pegok niki kepala,diak enda mukai mukai bisi ngangau tau tiki ke enda langkau saduai ia,diak Peragi nyenguk meda baka gamal Sandai enggau bala ke bukai bisi 4 iko sida ia tadi.Niki meh ko Peragi,laban langkau umai sida to besai diak bala ti nyamar mua baka Sandai nya tadi ngintu tubuh Gindam tang penyelai ia orang to baka nusu ngau nginsap tubuh Gindam nyau meriur meriur sida to tadi meda tubuh Gindam,diak Peragi nganu sida to ngujung sida to bado kenya,tang pegelansik runding Sinak to nemu utai nyelai nyadi alu ia ngerempung anak ia enggau ia ba dapur din,sereta ngangau ke Peragi ke dapur kin,diak Sinak alu narit jari Peragi madah utai nyelai nyadi,diak orang ti sebaka nunda gamal Sandai ngangau ke saduai ia ngasuh meri ai tuak agai sida ti lelak ngintu pemati Gindam,diak Peragi enggau Sinak nyampur ipoh enggau ai tuak tadi ngica ke orang nya mati ko Sinak.Udah Peragi meri tuak agai bala sida ia diak alu geguai ia lari naban ke anak Sinak kebukai belalai ba baruh rumah,nasib baka ke nemu bala anak Sinak tak nadai bemunyi sida ia belalai ba rumah lalu seduai ngusut tubuh sida ngena daun bau kentut ngica nadai bau tubuh mensia.

Maianya Sinak bisi anak mit berumur dua tahun ti bedau tindok di ema ia tadi.Kira enda lama udahnya dinga baru ga bala orang nya ngangau ke Peragi tang Peragi enggai nyaut laban ia meda utai nyelai nyadi.Meda saduai dkangau nadai nyaut diak saduai nyau ninga utai baka mensia makai utai,ninga orang netak utai meh saduai ia,ngujung Sinak nyau ka nyeraoh meda darah labuh baka ai ujan ari atas langkau tadi,diak Peragi nilik ari geregar buluh perin tadi diak nyau terpeda sida 4 iko to benung makai tubuh Gindam ti udah parai tadi.Peda ia sida to baka netak babi bebagi tubuh Gindam to tadi,.

Enda mukai mukai anak Sinak ke mit tadi nyabak ngujung bala antu ba atas tadi nyau baos ngiga munyi nya.Meda baka nya alu lari meh Peragi enggau Sinak to tadi enda bapai enda meindai ngemai anak Sinak to tadi.Antu to majak ngagai sida sabuat ia ngujung ba atai ba tanjung ai sungai diak Peragi teterap nyau ka dulih antu nya Peragi enti Kedie enda jampat nyimpung jari antu nya tadi,nasib keno ke jerita tuai Kedie maia to pulai ari ngabas panjok ngujung Kedie alu naban ke jari antu to lari enggau sida ia,tak capuh utai atai ari ulu diak Kedie terkenyit meda sungkup ti dtepan antu 3 iko nitih ari dudi,kedulu tadi tembu reraoh madah diri pedis.Nama agi deh lari meh sida sabuat,makin laju gik sungkup dtepan sida empat tadi nitih sida Peragi,Sinak enggau anak ia sereta Kedie,nasib atai ba rantau diak sida tetemu ke sida Sandai ti amai enggau bala kebukai ti atai ngesah pemati Gindam tadi,nama agi tak reradak meh Peragie nusi jerita ngujung ia enggau sinak nyau luput lalat laban kelalu lelak nglari kediri empu ari antu tadi,diak bisi manang kitai Iban ti bernama Uban Sedingan ti nemu ngadu pengawa utai baka diak alu nganti sungkup to tengah lubuk ari ulu rantau nya,dinga utai atai ari ulu nyau bergelemang ai nyau baka dpangka ke nitar utai atai ari ulu,diak manang Uban alu muka puchau muka alau muka sintau diak engkecit Tarang tuai kayau alu berekak enggau antu nya tadi,ngujung antu nyau ambis pecah pala nyau parai ngujung sida antu empat iko parai alu dtepo ba lungun nya tadi alu lungun nya tadi alu dtanam aki manang Uban Sedingan ba lubang ulak ba lubuk nya.

Pulai gai Kedie tadi ti naban ke jari antu nya tadi,nyadi keno ke jerita tuai Kedie to beberita amai udah bulih jari antu to tadi laban ia dsumpah raja antu Buya ngasuh ia berani ari ke udah sereta Kedie tau berubat,semua mensia ti kacau antu ambis dperubat ia ngujung ia dgelar aki manang Bedindang Seterang Ngempang.Ba jerita tuai ia to meh manang ti paling bisa maianya kelia,laban jari antu dsimpung ia nya jari ucu Sempulang Gana ti di curi antu megga raya.

Sebedau Aki manang to mati diak ia bepesan agai semua purih kitai Iban enti kitai ka ngaga pengawa nya kitai nego dulu enti ka ngereja utai bukai dulu.Baka kitai ka makai tang enda nyadi laban bisi utai dkerumban kitai dulu,tau nego dulu  kitai asi laban enggai ke punik.."nyengkau mimit alu suap ke mulut,tauka nego ngecar ke jari ba pinggai asi  pen tau,sereta tau nego ari kaban ti udah nego dulu ari kitai enti nyau ngilah alu telupa nego kitai jampat bersampi baka to.."Dah kie dah kie enggai ke punik,ptuiiii,nadai ku punik udah ku nego tadi..(ngludah ke tanah)"..

Ba penemu tuai utai to sigi amai kaban,ba kampung puang utai to mesti dititih au.Amai ku sembiang tang enti ba kampung puang sigi nego bakato aku.Laban ku kala meda bakih aku Melayu Sarawak empu nyau meriur bubur nasib jampat ditawar aki tuai rumah Katibas nya...anang macam macam ba kampung puang ka kuat ni beragama alah meh pemisa nya ti kitai masuk ke dunya sida ia baka kampung puang nya...

Keni komen nuan kaban udah maca jerita to??amai or enda kitai mesti negok enggai ke punik baka to??

Sarawak Untold Story.

Jerita Dumbang Pemerap Pala Setibang.

Dumbang to sigi kering ari mit nyentuk ke besai.Bepun nadai apai ketegal apai ia bebadi lesi lebuh ngayau ke Ulu Batang Kapuas diak Dumbang ari mit puas nyepi idup merinsa sereta ia sebilik suah dipetenah,alu dipejai sida sarumah laban meda bilik ia merinsa sereta enda bulih utai.Bepun ari to diak Dumbang meh ke nyadi tuai bilik ti ngidup sida menyadik ia Jimba,Genjai enggau Ijah sereta indai ia Punai.Pengering Dumbang to keno ko jerita maia agi ngangkat bujang diak Dumbang pedis ati laban teterap ba bandir kayu kasai ngujung ia merap bandir kayu kasai nya alu di tempalong ke ia kulu lubuk kira sepuluh rantau baru bedegum munyi kayu kasai terengkah dulu din.Dumbang to sigi di sumpah orang Panggau Libau lebuh ia bedau agi mit ia nyabak belama ngenang pemerinsa ia ditinggal apai ia tadi.

Ia dsumpah Gemuring Gading apai Keling alu dtempa apai Sera Mera sereta di unsut inik Andan ngena Batu Aji Bulan ti ngasuh ia tegal sereta kebal ngau tau ajih.Udahnya Dumbang kala berekak enggau Aki Remaong ba Bukit Empong Reradong enggau Bunsu Raja Genali ba Lubuk Dalam senentang Sungai Engkarie Ulu kelia menya.

Keno jerita tuai Dumbang to pulai ngasu ari ulu Sungai Engkarie diak ia kelalu rapal diak ia tadi terpeda ke buah mawang ti di gerempung orang ba tisi kerangan,bisi sepuluh igi peda ia,tak dempa Dumbang ambis buah nya tadi.Udah kenyang ia alu mupuk baru nyau ka rapal ia diak ia tepeda ke asi berlauk ke ikan ti bedau angat dengkah orang ba batu anchau ba tengah ai diak ia alu makai asi nya ga.

Nyau kira ka malam diak Dumbang ngaga langkau tak ngenyit tudah tuai ia meda utai nyelai tak petang tegayam kelemai nya dinga tak beraoh munyi utai alu ia utai negong baka orang ngasu diak Dumbang alu nyintak ilang laban ka ngadang utai nyadi.Diak Dumbang tekenyit meda mensia siko tak berikok iko alu mua sapiak mensia sapiak baka mua engkulik(harimau bintang)..Enda chamang chamang diak remaong tadi alu nerekam Dumbang tang Dumbang kering tak dpangka ia ba bandir kayu tapang remaong tadi dinga kalau kalau panjong remaong madah diri pedis,nyau ka malam ari seduai agi berinsah bejamah lebuh remaong mangkil tubuh Dumbang enda ga ulih empa ia nyau kerebai patah taring ia tadi.Meda Dumbang enggai alah alah diak Remaong to nanya sapa bangat nulong ia nya,diak Dumbang madah Gemuring Gading ti nulong ia diak nyau nyabak tudah remaong laban saru empa saru tajo.Diak ia merap Dumbang tang Dumbang nyilat alu mangka ke Remaong ba batu anchau ngujung Remaong madah diri alah bulu ari Dumbang.Nya baru Dumbang ka sekaban enggau ia.Udah nama deh tak bantai remaong magang meh utai dempa.Kira enda lama udah nya dinga ai beriak baka bisi ombak mangka ke tebing peda pansut Bunsu Raja Gennali,diak aki remaong ka madah ke Bunsu Raja Genali nya ucu ambu ia tang Dumbang enda ngasuh aki Remaong nya madah laban ia ka berekak enggau aki Bunsu Raja Genali.Diak enda chamang alu merejok tudah Dumbang agai Bunsu Raja Genali alu besatup engau Bunsu Raja Genali tadi peda tak raoh raoh Bunsu Raja Genali jamah Dumbang,ambis tugak,apat enggau batu anchau temepar laban Dumbang mangka ke Bunsu Raja Genali nya tadi.Maia Bunsu Raja Genali ngetup Dumbang tak ketawa lelekik Dumbang laban gelesi digaga bakanya,meda utai baka ngetu tudah Bunsu Raja Genali alu nanya sapa bangat nolong ia diak Dumbang madah Gemuring Gading diak Bunsu Raja Genali minta ampun laban salah tajo salah empa..Ia ka merap Dumbang tang Dumbang tak mangka ia ba bandir tebelian ngujung pun tebelian mesai tibang tuai nyau rumpung patah dua.Diak nyau nyabak madah diri alah Bunsu Raja Genali tadi nya baru Dumbang ka babaik enggau ia.Ia alu nitih ke Dumbang pulai ke langkau diak ia terpeda ke aki Remaong benung ngintu pelanduk dulih ia tadi.Diak Bunsu Raja Genali nganu Aki Remaong laban ia enda madah ke ia ti Dumbang nya tolong orang Panggau Libau.Diak aki Remaong ketawa lelekik ia madah ia pen baru nemu ti ia dulu nemu enda ia patah ngeli taring sambil mantai ngeli ia ke rabang alu Bunsu Raja Genali ketawa alu mantai ke kukut sereta mata nyau biru laban Dumbang sereta ia nunjuk mata ia nyau mesai lengan demaram laban jamah Dumbang.

Keno jerita tuai Dumbang kala berjamah enggau antu raya ba Ulu Sungai Engkarie ti ngujung Dumbang to dsumpah nyadi orang pematak kayau menua,ba jerita tuai Dumbang to meh pengemai pemindah kitai Iban ari Sungai Engkarie ti dulu nuju menua Kapit.

Dumbang to keno ke jerita tuai ia parai nadai bekubur ketemu orang ia pulai agai Panggau Libau.Dumbang to suah pansut baka ba Nanga Gaat,Nanga Lemanak,Nanga Tekalit enggau Nanga Skrang sereta kala dpeda ba Batang Ai,kelai ia pansut nya tanda menua nya enda aman keno ko jerita  tuai.Nyadi madik ia Ijah udah dambi orang Panggau nyadi ke bini anak Sempurai.Alu Dumbang enda kala bebini keno jerita tuai.Penama Dumbang to kala suah pansa pengap orang lebuh ka ngayau kelia laban ia to ketuai pematak kayau menua ti kala ngalah sida Pungga enggau Sempurai enggau Tutong Bujang Rengayong.Pia mega ia to meh mensia ti agi meruan idup nyentuk kediato...

Ari kenang aki tuai Kuling ti idup lebih ratusan ribu..Negi ku mantai penama 29 iko pahlawan kitai Iban ti idup beratus taun nyentuk kediato agi idup meh...
Maioh orang enda pecaya tang pecaya meh lebuh sida to datai ngimbai nuan empu enda nemu sapa sida ia...tang aku pecaya laban kami to purih aki wai Kuling..

Sebai Ensumbar Pengangkat Kayau Tuai

The Great Warrior Woman at Sea Dayak People at Borneo Headhunters.
The Sarawak Untold Story.

Sebai Pengangkat Kayau Tuai...

Jerita to ku tampung ari kenang orang tuai kelia sereta ari kenang aki tuai Kuling.

Nyadi kelia bisi apai tuai siko ti benama Sampuk jadi enggau Bangan ti beranak purih indu magang.Anak saduai bisi 6 iko tak indu magang keno ke jerita tuai.Meda ia nadai purih anak lelaki  diak ia dkanggau orang punas pengetan bilik ti nadai anak lelaki.Kelia enti kitai melaki bini nadai anak lelaki sigi kumbai orang punas pengetan bilik.

Nyadi Bangan beranak ke Sebai,Janam,Pagie,Luli,Sangan,enggau Anau.Laban Sebai to mancal sereta ka amai begulai enggau apai ia Sampuk enggau aki ia Berinau diak ia baka orang lelaki nyau nemu reti pengidup ngidup kediri ba kampung puang,pia mega ia puas nyabak dajar aki ia Berinau to ba penemu orang tuai kelia baka,kuntau,kajat bebunuh,sereta maioh macam agi ti ngujung Sebai jauh kering ari bala lelaki maianya.Amai ia indu tang Sebai to baka orang lelaki tubuh ia,nyau bersenggal sereta kering.Maioh bala lelaki enggai ke ia tajapen ia bajik pandai betenun sereta nemu ngereja pengawa orang ke indu dara maianya.Sebai maia to sigi amai tampak berita,sema jako maioh indu dara maianya kelia alah penemu ari Sebai to laban Sebai ulih ngaga pengawa indu enggau jampat sereta pengawa lelaki ditemu ia magang,ba kenang orang tuai Sebai to nemu ngaga ilang kediri empu ti dberi orang pejuluk ilang pegerawang yauka ilang perawai..laban enti ia dulu sigi ambis munsuh bersepar lari laban ilang dpegai ia kin kia mantap pala munsuh.

Keno ko orang tuai Sebai to ditulong Kumang enggau Lulong alu dangkat nyadi anak angkat aki Sempulang Gana enggau Aki Sengalang Burung sereta ditulong Aki Remaong enggau Inik Remaong.Nyadi sekali lebuh sida sarumah bebai ngayau laban malas pemati Unam ti parai dpumpung munsuh lebuh ia pulai ari umai diak sida sarumah baum ngayau ke malas pemati nya ngujung Sebai enggau ti ngari tubuh ari apai ia Sampuk laban tudah Sampuk udah enda dapat laban dempa pisa ba patung,nyau ka nyabak Bangan meda anak Sebai tak enggau nurun ngayau,pungka ke lelaki enda ngasuh Sebai enggau tang meda pengeran Sebai ka enggau diak Tuai  Rumah ngasuh ia enggau aja tang ia dasuh nguan langkau maia ngayau sereta nyumai ke sida aja.Diak engkecit anak Unam ke indu ti bernama Sinja ka enggau bebalas ke pemati apai ia Unam tang ditagang akak ia Nirau tang Sinja enggai ninga tak alu nyikap diri nurun ngayau Sinja to tadi.Nyadi ia saduai aja meh ke indu nitih ke lelaki nurun ngayau maia nya,lebuh malam diak Sinja bemimpi ia terpeda ke Sebai duduk betunga enggau Kumang enggau Lulong,meda Sinja bisi di peda ayan ba mimpi diak Sebai ngasuh Kumang enggau Lulong nulong Sinja,nyadi keno ko orang tuai Sinja to ditolong orang Gelong baka sida Tutong,Andak Segatak,indai Abang enggau Bunsu Ribut.

Lebuh atai ba rumah munsuh diak sida ia bermalam baruh  tinting bukit ti melunggang seberai nyau rumah munsuh.Maia nya munsuh benung begawai ke antu pala.Sebedau nyerang diak Sebai enggau Sinja dasuh ngibun langkau.Maia pagi nya sida nyerang rumah panjai munsuh tang kota munsuh enda ulih terumpang laban sida ia laban munsuh bisi ngembuan pucau kota ti bisa.Diak enda mukai mukai tak ngemejul kediri Sebai  enggau Sinja ba depan pintu kota munsuh alu engkecit Sebai alu nyintak Ilang Perawai tak pantap ia pintu kota tak teperunsai rarah meniga rarah ngempat pintu kota,tak dendet Sinja tiang kota tak tumbang pintu kota tak perawai ke Sebai baru ilang nyabur ti beri pejuluk Nyabur Ngerumpang peda  tak putus mendua pagar kota ti digaga ari kayu tebelian.Tak rerangap orang ke laki sida sarumah meda pengering Sebai enggau Sinja,laban munsuh udah sedia ari dalam kota laban sida nemu bisi munsuh sigi atai kia diak alu dsintak Sebai ilang Perawai diak Sinja alu nyintak ilang tenpan penalan..Tak engkeecit tudah Jantai ti matak kayau tak kasak ke Jantai kiba kanan munsuh tang bedau ga maioh dpeda alu meda kenya alu berlanda Sebai enggau Sinja agai Jantai alu sida tiga alu ngerawang munsuh ari pintu kota alu kabukai pen nyau bedurut nitih sida tiga...

Keno ko jerita tuai pemulih sida ia tiga to tadi nyau bedunjung bangkai munsuh laban Jantai dsagu saduai ia ti nitih ke Jantai ari belakang,ba mimpi saduai ia,saduai ia mesti nyagu ke Jantai alu nulong ia tang saduai ia enda tau jadi enggau Jantai laban ti jadi sema salah siko saduai ia jadi enggau Jantai to saduai ia ka bebadi ti udah beranak ila.Kabuah ia laban Jantai to anak iru Kumang enggau Keling.

Kelia meri nama dua iko indu to enda dsebut ba jerita tuai laban pungka lelaki maianya malu alah bulu ari saduai ia.Lebuh pulai ari ngayau ari menua munsuh diak Sebai enggau Sinja to ngemai pala munsuh naka pemaioh ngujung pungka lelaki maia nya malu ngambi ka saduai nyadi bini..

Sebai engauu sinja to suah engau Jantai ngayau kin kia agi menya ngujung maia Sebai enggau sinja ka belaki diak Jantai to nguji pungka lelaki ti ka nyadi laki saduai ia laban Jantai to kira menyadik saduai ia ba dunya Panggau Libau ti di iru Kumang enggau Keling tang ba dunya nyata sida tiga kediri apai indai.

Lebuh Sebai ngandung ke anak ia ketujuh iko diak rumah panjai sida diserang munsuh lebuh sida pungka lelaki nyau begiga pemakai kena ngintu gawai,keno ko jerita Sebai enggau Sinja ti baru lepas pantang ari beranak ti ngetan rumah panjai sida ia tak engkecit Sinja alu nurun Sebai ngemai ilang Perawai enggau Nyabur Pegerumpang tak begetar tanah dindah meda Sebai mantai ke nyabur bisa nya tak ambis parai munsuh kira 30 iko tadi dpumpung saduai ia Sinja.Kira lemai ari nyau nyeraoh sida pungka lelaki ke datai begiga meda bangkai mensia ari sapiak munsuh nyau ambis rumpung nadai pala dkasak ke Sinja enggau Sebai.Bepun ari to meh Sebai beranak ke Bujang Berani Bujang Kempang Bujang Nindang ti beri penama Bedindang Umpang.Bedindang enggau madik Lintang kala ngayau ke agai Bukit tinggi penimpai menua ti dkumbai kitai kediato Gunung Kinabalu ti ku pelaba meh laban nya aja bukit paling tinggi ti bisi ngembuan nabau biru agi kelia.Maia to saduai ia ngiga tisik nabau kena ngidup ke madik saduai Lintau ti kena sakit ampus keno ko jerita tuai.

Keno ko jerita tuai lebuh Sebai parai laki diak Sebai enggai belaki agi ia alu ngajar bala ba penemu orang tuai,ba jerita tuai semua anak Sebai to beberita magang udah maia besai baka Lintau ti digelar Papau Jejuau ti nemu adat beburung enggau nemu nilik utai ka nyadi sereta nemu utai udah nyadi.Alu sida ari anak Sebai to meh kitai Iban nemu reti pemali ti maioh agi.

Naka to dulu jerita ku kaban..

Sarawak Untold Story.
The Great Warrior Woman at Sea Dayak People at Borneo Headhunters.

Mari kita tengok misteri seluruh dunia,mungkin ada yang anda belum tahu rahsia nya kerana banyak keajaiban di dunia yang belum terungkai kata...jom saksikannya...

https://www.facebook.com/pages/Chapuhhh-Uuu/1471238243151245